अलीकडेच वाटतंय प्रचंड
घ्यावा शोध स्वतःचाच
का जन्मलो,कोण आहोत,का जगतोय
उलगडा व्हावा रहस्याचा ...
अलीकडेच वाटतंय प्रचंड
करावं लक्ष्य स्वतःलाच
आरसा तर कौतुकच सांडतो नेहमी
भडीमार व्हावा टीकेचा ...
अलीकडेच वाटतंय प्रचंड
द्यावं आव्हान स्वतःलाच
हार - जीत फैसला झालाच पाहिजे
नाश व्हावा तटस्थाचा ...
अलीकडेच वाटतंय प्रचंड
प्रचंड उत्तुंग बनवावं स्वतःलाच
फोडावी खुजी प्रतिमा माझी माझ्याच मनातली
घालून घाव इच्छाशक्तीचा ...
अलीकडेच वाटतंय प्रचंड
पुरे,थांबवावं आता अचानक स्वतःलाच
हा अपुरा जन्म खूप अवघड वाटतोय जगताना
पुनर्जन्म घ्यावा स्वतःचा ...
No comments:
Post a Comment