(प)रागदारी 5

बॉस

राग: यथेच्छ माज यथेच्छ खाज

सलाम बॉस.. काय मग, कसे आहात बॉस.. सर्व काही कुशल मंगल ना बॉस? तुम्हाला वाटेल आज अचानक हे बॉस बॉस काय लावलंय, पण असं नाहीये ते. बास का बॉस,. आमचीपण काही क्रिएटीव्हिटी नको काय अधूनमधून? आणि हे उगाच नाही, तर अतिदर्जेेदार हिंदी गीतांच्या रसग्रहणात आजचे गाणेच असे बॉसपुराण गाणारे, बॉसची कायच्या काय महती विशद करणारे आहे. होय, अक्षयकुमार उर्फ अक्की यांचे बॉस हे गाणे. हे गीत अक्की महाराजांच्या बॉस नामक चित्रपटाचे शीर्षक गीत होय. 'यथेच्छ माज यथेच्छ खाज' या रागातील या गीतासाठी पेन वापरलंय कुमार यांनी, गळा साफ केलाय मीत ब्रदर्स, अंजान आणि द यो यो हनी सिंग यांनी तर बाजा वाजवलाय मीत ब्रदर्स अन अंजान यांनी. 

चला तर जरा वाट करून द्या.. ओह, तुम्हाला नाही म्हणत हे मी. सॉरी,. चुकून थेट रसग्रहणच सुरु केले. आधी प्रथेप्रमाणे या प्रारंभीच्या अप्रतिम काव्यपंक्ती पाहू...

मेक वे फॉर द बॉस...
ओह मदर फादर लिसन अप.. वोह
है गली गली में शोर, है बॉस में इतना जोर
इक बार भडक जाये, तो धरती देगा तोड

वा वा वा, म्हणजे सुरुवातीलाच असे म्हटले आहे की बॉस, सॉरी द बॉस यांचे थोड्याच वेळात या ठिकाणी आगमन होत आहे. तर ऐका हो ऐका, महत्त्वाची गोष्टेय, सर्व मातापिता वर्ग, नीट कान देऊन ऐका, लक्ष देऊन ऐका. चला हवा येऊ द्या, म्हणजे जरा वाट करून द्या. गल्लीगल्लीत ज्याच्या नावाचा डंका (आणि दणकाही) आहे तो बॉस येत आहे होsss, त्याच्यात इतकी मस्ती, सॉरी रग आहे, जोर आहे की तो भडकला तर या अख्ख्या धरतीचेच तुकडे तुकडे करून टाकेल. तो येत आहे होsss 

मिनिस्टर जैसे तेवर, हर कोई लेता फेवर
अपनी अप्रोच उंची, हम तो है दुनिया के बॉस
ह्याबिट अपनी है देसी, ट्रको में फुल है एसी
म्युझिक सुनते है हाय, हम तो है दुनिया के बॉस

बॉसचे वर्णन करताना पुढे असे मांडले आहे की या बॉसचे नखरे, म्हणजेच जीवनशैली, राहणीमान इत्यादी गोष्टी एखाद्या नेत्यासारख्या आहेत. याला म्हणतात उच्च राहणी आणि उच्चच्यापण वरची विचारसरणी.. मग कुणीही त्यांच्याकडे मदतीची अपेक्षा करत याचना करू लागला तर त्यात नवल ते काय? बॉसची ओळख वरपर्यंत आहे, म्हणूनच ते जणू अवघ्या विश्वाचे बॉस आहेत. (अतिशयोक्ती अलंकार) त्यांची सवय मात्र देसी आहे, उदाहरणार्थ: वातानुकुलित ट्रकमधून प्रवास करताना मोठ्या आवाजात संगीत ऐकणे. वा वा, आपल्या मातीशी मुळं घट्ट असावीत ती अशी. चला पटकन टेका डोके, बॉसच्या चरणी लीन व्हा. कारण,

बॉस... है हुकुम का इक्का, बॉस...है लाखो का सिक्का
बॉस...हर जगह पे लिख्खा, बॉस...बॉस...बॉस...बॉस...
बॉस...सिक्स पॅक का शहेनशाह, बॉस...बस ब्रांड पहनता
बॉस... अटीट्यूडसे बनता, बॉस...बॉस...बॉस...बॉस...

बॉस हाच खरा हुकमाचा एक्का आहे, तोच लाखात एक असा अस्सल सिक्का आहे. जळी स्थळी काष्ठी पाषाणी असे यत्र तत्र सर्वत्र केवळ एकच शब्द लिहिला आहे - 'बॉस', नव्हे जणू शिलालेखावर कोरतात तसा कोरूनच ठेवला आहे. बॉसची बॉडी पण लय भारी आहे राव, सिक्स पॅकचा शहेनशहा या भूतलावर कुणी असेल तर तो एकमेवाद्वितीय असा बॉसच. तो केवळ ब्रांडेड कपडेच परिधान करतो (सांगितले ना तो उच्च राहणीवाला आहे म्हणून). असा बॉस बनणे म्हणजे कोणा सोम्यागोम्याचे काम नव्हे, ऐऱ्यागैऱ्याचेही नव्हे, येरागबाळ्याचे तर त्याहून नव्हे. (थोडक्यात आपल्यासारख्यांचे नव्हे.) जबरनाक खतरदस्त अटीट्यूडच्या सहाय्यानेच बॉस बनणे शक्य आहे. यातून कवी हलकेच जीवनात यशस्वी होण्यासाठी सुयोग्य दृष्टीकोन असणे किती महत्त्वाचे आहे हे अलवार सांगून जातो.  

   

अब अपनी के तारीफ करू, उपरवालेसे में डरू
जे कोई बने घन लेंडलॉर्ड, उने मार घुसांड मैं धरू
हम हरयाणा के इकलोते किंग, बहुत है अपनी फ्यान फोलोइंग
पर अपने को कोई फर्क नि पडता, वोई है सबका कर्ता धर्ता

यापुढे यो यो हनीसिंगांचा करिष्मा सुरु होतो. बॉसला शरण जाऊन त्याला सबस्क्राइब होऊन त्याची महती डिस्क्राइब करताना हनीभाऊ त्यांच्या अनोख्या शैलीत पण बॉसच्या वतीने म्हणतात, आता मी माझेच काय कौतुक करू? असामान्यत्वाला पोहोचूनही नम्र बॉस त्या परमेश्वराच्या चरणी मात्र नतमस्तक आहे आणि म्हणूनच आत्मप्रौढीचा धोका तो पत्करू इच्छित नाही. परंतु म्हणून कुणी बॉसच्या क्षमतेविषयी शंका घेण्याची हिम्मतही करू नये.

उदाहरणच द्यायचे झाले तर बॉसच्या इलाख्यात कुणी अन्यायी जुलमी जमीनदार असलाच तर गाठ बॉसशी आहे, त्यामुळे नीट जगायचे असेल तर गप (आपापल्या) चड्डीत राहावे. काही झाले तरी आपण हरियाणा प्रांताचे एकमेव राजे आहोत, आपले भक्त असंख्य आहेत.. पण ही जाणीव असूनही नम्र बॉसचे म्हणणे असे आहे की ह्या नश्वर इहलोकातल्या अशा भौतिक गोष्टीनी त्याला फरक पडत नाही, ही धुंदी त्याच्या डोक्यात जात नाही, कारण शेवटी कर्ता करविता तो परमेश्वर आहे हे तो मनोमन जाणून आहे. वा वा, अंगी नम्रता असावी ती अशी. नाहीतर आजकाल अर्ध्या हळकुंडाने पिवळे होणारे काय कमी आहेत? सतत स्लेजिंग करणारे माजोर्डे ऑस्ट्रेलियन क्रिकेट खेळाडू यातून काही शिकतील काय?      

दिल का हू थोडा रंगीन, पर भैंस के आगे न बजाता बीन
मुझको तो तू आगी पसंद, कमॉन बेबी डोन्ट बी मीन
आज तेणे सैर करादू, गुची लुइस तने दिलवा दू
अक्षय कुमार तो भाई है अपना, तू बोल तो सही फोटो करादू  

हा बॉस काही फक्त राकट, धटिंगण, रफ एन टफच नाही तर इनफ संवेदनशीलही आहे. म्हणूनच पुढे बॉसची हळुवार बाजूही मांडली आहे. तो रसिक मनाचा आहे, थोडासा रंगेलच म्हणा ना. पण म्हणून काही तो दिसली मुलगी, पड प्रेमात या कॅटेगरीतलाही नाही. अर्थात एखादी आवडल्यास तो तिला प्रेमाने जवळ बोलावतो, तुला फिरवून आणेन म्हणतो, इतकेच काय तर तुझे जे काय स्त्रीसुलभ हट्ट असतील तेही पुरवेन म्हणतो. असे लाडबिड पुरवणारा साथीदार मिळाल्यास स्त्रीची भीड आपसूकच चेपते नि मग फॉर फ़र्दर वाटचाल, ती शक्यतो कुणाची भीड बाळगत नाही.

'अगं तुला म्हणून सांगतो, अक्षय कुमार स्टार असेल जगासाठी, अपुन को तो भावासारखाच आहे, तुला हवा तर त्याच्यासोबत तुझा फोटोही करून देतो, बोल गं तू बोल फक्त, पायजेल तर बोलच. तेवढी वट आहे आपली.. टेन्शन नै बग.' वा वा, यातून बॉसमधला बंधूभाव हा अंगभूत गुण तर दिसतोच, शिवाय समोरच्याची आवडनिवड लक्षात घेऊन त्यानुसार त्या व्यक्तीला मदत करण्याची, त्याद्वारे आनंदी करण्याची वृत्तीही प्रकर्षाने दिसते. सांगा किती आहेत आज असे निर्मळ मनाचे लोक, मोजायलाच गेलात तर एका हाताची बोटेही जास्त होतील कदाचित. असो..

बादशाह सबके, बडे बडे रहते दबके
शाही नेचर, लार्ज हार्टेड बंदे रब के

असा हा बहुत जनांसी आधारू असणारा बॉस अर्थातच अगदी निर्विवादली सर्वांचा बादशाह ठरतो. भले भले त्याला वचकून राहतात ते म्हणूनच. मनाची श्रीमंती अपरंपार असल्याने ज्याचे मन मोठे आहे (डबल एक्सएल साईज तर सहज) आणि ज्याचा थाट राजेशाही आहे (डबल बहुव्रीही समास, आणि सांगितलं ना दोनदा ऑलरेडी की उच्च राहणी म्हणून) असा हा बॉस, याला काही तोडच नाही. 

ऑल वर्ल्ड में अपना डंका, फुंके ये दुश्मन की लंका
चॉपर बनाले सर का पंखा, दे दे रुकी ट्रेन को धक्का 

अशा या बॉसचा जगभर डंका पिटला जातोय आणि हे तो कम्प्लीटली डिझर्व्हच करतो. शत्रूच्या लंकेची तर हा अश्शी अश्शी वाट लावू शकतो. हेलीकॉप्टर तर बॉस डोक्यावर पंखा म्हणून वापरतो, आणि एवढेच नव्हे तर थांबलेल्या ट्रेनलाही तो एक हलकासा धक्का देऊन सुरु करू शकतो. वॉव, मुंबईचे लोकल ट्रेन व्यवस्थापन याकडे लक्ष देईल काय? स्पेशली सेन्ट्रल आणि हार्बर लाइन, उगाच किती रविवारी मेगा ब्लॉक घेत बसणार राव आणि पेंटाग्राफ तुटले म्हणून लोकलसेवा विस्कळीत झाल्यावर प्रवाशांच्या, चाकरमान्यांच्या शिव्या तरी किती दिवस खाणार? त्यांचे होणारे हाल तरी कमी होतील, दुवा मिळतील तुम्हाला... घ्या जरा मनावर. आमचा बॉस उदार मनाचा आहे, नाही म्हणायचा नाही.
   
हे यो लिसन एव्हरीबडी, द बॉस इज एव्हररेडी
टू ब्रेक अँड शेक इट डाऊन
बॉस खिलाडी है, सेक्सी बॉडी है
हरयाणा में खुद की पहाडी है, बॉस तो होते थोडे नॉटी है
बडी कूल उसकी बहन की लोरी है

हे यो, (अध्यात्मात, ध्यानधारणेत श्री आणि ओम यांना जे महत्त्व आहे तेच अशा आधुनिक गाण्यात हे आणि यो यांना आहे. ते म्हटलेच पाहिजे, दखल घेतलीच पाहिजे.) प्रत्येकाने ऐका, बॉस २४*७ तय्यारच असतो - कद्दीपन केव्वापन कुट्टेेपन. तोच खरा खिलाडी आहे, त्याची बॉडी तर तोबा तोबा प्रमाणात सेक्सी आहे. अरे टिचभर टू/थ्री बीएचकेचा रुबाब करणाऱ्यानो, हरियाणात बॉसचा स्वत:चा अख्खा एक डोंगर आहे डोंगर, आहात कुठे? या खोडकर बॉसची भगिनी अंगाई गाते तीही किती प्रसन्न वाटते. थोडक्यात त्याचे खानदानच कलासक्त आहे.

है बडे धुरंधर, दुनिया है अपने अंडर
अपने ऑर्डरसे, बदले हर साल कॅलेण्डर
ऑलराईट है अपने फंडे, माइंड गरम पर दिल के थंडे
टेस्ट को खेले समझके वनडे
करदे हर दिल को पक्का
हे ये सुनलो सारे, ये बॉस हमारे है तगडे चट्टाने फाडे

श्रीयुत बॉस हे सॉल्लिडपैकी रणधुरंधर आहेत. त्यांच्या रीतसर परवानगीशिवाय पानही हलत नाही. अहो साधे वर्षदेखील संपून नवे वर्ष सुरु होताना बॉसची परवानगी काळालाही घ्यावीच लागते. म्हणजेच काळही थिजवून ठेवणाऱ्या या बॉसच्या टाचेखाली जणू ही अवघी दुनियाच आहे. (बापरे, वामनावतार रिटर्न्स की काय!)

ते काही असो, पण बॉसला क्लिष्टता आवडत नाही. त्याचे सारे फंडे, त्याची तत्त्वे मात्र अगदी सरळ नि स्पष्ट आहेत. भडक डोक्याचा असला तरी तो सहृदय नि हळवा, कोमल मनाचा आहे. कसोटीही तो वनडेप्रमाणे खेळतो (सेहवागच्या डेट्स न मिळाल्याने अक्षयला सिनेमात घेतले असावे).. कमकुवत मनाच्या लोकांना मजबूत मन कसे आत्मसात करावे हेही तो शिकवू शकतो. उद्या बॉस मोटिव्हेशनल स्पीकर बनला किंवा त्याने काउन्सेलर म्हणून ऑफिस टाकले तर आश्चर्य वाटायला नको. अरे बॉस इतका तगडा आहे की मोठमोठे खडक वा शिळाही तो अस्से अस्से तोडू फोडू शकतो. (अशीच एखादी शिळा फुटून त्यातून आणखी एखादी अहिल्या बाहेर येईल काय?) ताकद का चेष्टा राव! तर असे हे बॉस द ग्रेट!       

             

तर हे होते या आजचे दमदार गाणे. लवकरच भेटू पुन्हा एकदा अशाच नव्या अतिदर्जेदार गाण्यासह. तोपर्यंत सर्वशक्तिमान बॉसला शरण जा आणि वेळच्या वेळी त्याने दिलेलं ऑफिसमधलं काम पूर्ण करत जा. समस्त नोकरदारो के हित में जारी.  तुमच्या दुनियेचा तोच बॉस आहे. आणि नवरे लोक्स, सात फेरे घेऊन तुम्हीच घरात हौसेने वाजतगाजत आणलेल्या बॉसला शरण जा. त्यातच तुमचे (दोनवेळच्या  जेवणासकट) भले आणि लाइफ़टाइम सौख्य सामावले आहे.