घेई छंद
'संध्याकाळी जेवायला या, पोळी भाजी वरणभात आहे' असं कुणी म्हणावं आणि आपण जाऊ तेव्हा चक्क पंचपक्वान्नांनी भरलेलं ताट समोर यावं तसं झालं या ९ तारखेला माझं. शिवाजी मंदिर, दादरला सुबोध भावेंच्या 'घेई छंद' या बहुचर्चित बहुप्रतिक्षीत पुस्तकाचा प्रकाशन सोहळा होता. ऑनलाईन बुक केले होतेच, पण निर्मितीतले अनुभव, ती प्रोसेस जाणून घ्यायला मला जास्त आवडते म्हणून गेलो. अनिकेत बोले या माझ्या समव्यसनी मित्रालाही सांगितले, तो जरा उशिरा पोचणार होता, मग पासेस घेऊन ठेवले आणि कार्यक्रम सुरु होईपर्यंत सवयीने बाजूलाच मॅजेस्टिकमध्ये गेलो, पुस्तकं बघत होतो तर तिथूनच बाहेर पडताना कोण दिसावं.. तर दस्तुरखुद्द उत्सवमूर्ती सुबोध भावे.
बालगंधर्व, लोकमान्य या चित्रपटांची जन्मकथा आणि कट्यार काळजात घुसली या नाटकाची तसेच चित्रपटाची जन्मकथा, आलेले वेगवेगळे अनुभव, धमाल किस्से वगैरे सर्व गोष्टींची रेलचेल असलेले हे अनोखे पुस्तक. कार्यक्रम सुरु व्हायला थोडा वेळ होता, तितक्यात एकेक करत अनेक सेलिब्रिटीज येऊ लागले. एक ऑडी आली, त्यातून एक सहा फुटी कायच्या काय वेल बिल्ट माणूस उतरला, त्याच्यामागे मुली वेड्या होऊन ए वॉव, हाsss, आऊ, अय्या, हवेत ओठाचे चंबू, हातवारे वगैरे करत सुस्कारे टाकत गेल्या. पण मला जॉन अब्राहम फक्त मद्रास कॅफेमध्ये आवडलाय. आम्ही दोघांनी आय लेव्हलला एकमेकांकडे बघून न बघितल्यासारखे केले, मी हातातला चहा सोडून गेलो नाही. जाऊ दे, तसंही स्नो असो किंवा अब्राहम.. जॉन नोज नथिंग..
थोड्याच वेळात कार्यक्रम सुरु झाला. सुरुवातीला सुबोध भावे, स्वप्नील जोशी यांच्या डिसेंबरमध्ये येणाऱ्या 'फुगे' चित्रपटाचे ट्रेलर लॉन्च जॉनच्या हस्ते करण्यात आले. जॉन छान मराठीत बोलला. फुगे फुल धमाल वाटतोय.. मूळ कथा सुबोध, स्वप्नील यांचीच आहे. ती फुलवलीये अभिजीत गुरु, हेमंत ढोमे या लेखकांनी. स्वप्नील जोशी, निशिकांत कामत, प्रार्थना बेहेरे, दिग्दर्शिका स्वप्ना वाघमारे-जोशी इत्यादी फुगेची संपूर्ण टीम स्टेजवर होती. शिवाय काल ९ नोव्हेंबर - सुबोधचा वाढदिवसही, अर्थात तेव्हाच केक कटिंगही झाले.
मग आले कट्यारचे संगीतकार पंडित जितेंद्र अभिषेकी यांचे पुत्र शौनक अभिषेकी. सुबोधने शौनक आणि त्याच्या मैत्रीबद्दल पुस्तकात तब्येतीत लिहिलंय. निवेदिका पूर्वी भावेने त्यातला काही भाग वाचून दाखवला. कार्यक्रमाच्या सुरुवातीस शौनकचे शास्त्रीय गायन व्हावे ही सुबोधची इच्छा, म्हणून त्यांनी मधुरंजन राग सादर केला. त्यानंतर कट्यार नाटकाबद्दल गप्पा सुरु झाल्या. अर्थात त्या संचात काम केलेले राहुल देशपांडे, महेश काळे, वेदश्री ओक स्टेजवर येऊन त्यांचे अनुभव, किस्से शेअर करू लागले. गायिका आशा खाडिलकर यांची मुलगी वेदश्रीने 'घेई छंद' गीत झकास सादर केले, सोबतीला पेटीवर त्यांचे पती आदित्य ओक होतेच. यानंतर 'पंचतुंड नररुंडमालधर पार्वतीश आधीं नमितों' यावर सोनिया परचुरे यांनी नृत्य सादर केले, त्याच कट्यार सिनेमाच्या कोरिओग्राफरही होत्या.
'बालगंधर्व' सिनेमाची टीम यानंतर स्टेजवर आली. रवी जाधव, कौशल इनामदार, नितीन देसाई, महेश लिमये आणि सुहास जोशी, अविनाश नारकर, अभिजीत केळकर वगैरे... त्यांच्याशी रंगलेल्या गप्पांतून बालगंधर्व त्यांनीच पुन्हा जगला. सुबोध बालगंधर्व साकारताना स्त्री आणि पुरुष या दोन्ही भूमिकांसाठीचे फिजिक, तसेच लोकमान्य करताना फिजिकवर घेतलेली शिस्तबद्ध मेहनत ज्यांच्या मार्गदर्शनाखाली झाली त्या परुळेकर मास्तर यांना सन्मानाने सुबोधने स्टेजवर बोलावले. सुबोधसह आजघडीला ४५ मराठी कलाकारांचे आता ते फिटनेस ट्रेनर आहेत. कौशलजींच्या चिन्मया सकल हृदया गाण्यावर मध्यंतर झालं.
बाहेर येताच काउंटरला असलेल्या कॉपीज मी आणि अनिकेतने घेतल्या, चेरी ऑन द केक म्हणजे पुस्तकासोबत या तिन्ही सिनेमांच्या डीव्हीडीज फ्री आहेत. पुस्तक खरंच देखणे, नीटनेटके, सर्वांगसुंदर. 'काउंटरवर पाचशेच्या नोटा चालतील, आज घेऊ' असं कार्यक्रमात आधीच सांगण्यात आलं होतं. पण आम्ही ऑनलाईनवाले.. दुपारीच फोन करून विचारलं होतं त्याप्रमाणे प्रिंटआउट देऊन आमची पुस्तके घेतली.
मध्यंतरानंतर लगेचच पुस्तकाचे प्रकाशन बऱ्याच दिग्गजांच्या हस्ते झाले. स्टेज पूर्ण भरलेच होते. सुबोधने त्याचे आईवडील, पत्नी आणि दोन्ही मुलं यांना यावेळी स्टेजवर आवर्जून बोलावले. मग 'लोकमान्य' आणि 'कट्यार' सिनेमांच्या टीमशी एकत्र गप्पा झाल्या. लोकमान्यचा दिग्दर्शक ओम राउतने सुबोधचे सांगितलेले डेडिकेशन अचंबित करून गेले. कट्यारबाबत सचिन पिळगावकर, अमृता खानविलकर, मृण्मयी देशपांडे यांनी आपले अनुभव सांगितले. कार्यक्रम गारुड करत जात असतानाच त्या दरम्यान काही टप्प्यांवर पूर्वी भावे, सीमा देशमुख, मृण्मयी देशपांडे यांनी पुस्तकातल्या काही भागाचे अभिवाचनही मस्त केले.
उत्तरोत्तर खूपच रंगत गेलेल्या या कार्यक्रमाचा शेवटही तितकाच उंचीवर होणार हे कळत होतंच, कारण वेदश्रीचं गाणं झालं तेव्हा राहुल, महेशचं गाणं झालं नव्हतं आणि पूर्वीने तर मध्यांतरापूर्वीच सांगितलं होतं की 'काळजी करू नका, सर्वांची गाणी होणार आहेत'. अर्थात राहुल देशपांडे आणि महेश काळे यांनी क्लायमॅक्सला स्टेज ताब्यात घेतलं. सोबत करायला पेटीवर आदित्य ओक, तबल्यावर प्रसाद पाध्ये. अप्रतिम जुगलबंदी - सुरत पिया की - पुढची पंधरा मिनिटे शिवाजी मंदिराचा पत्ता स्वर्गात होता. नाऊ इट वॉंज ओव्हर बट नॉट ओव्हर, कारण तो हँगओव्हर घेऊनच पावलं स्टेशनकडे जायला लागली. बंपर लॉटरी की जॅकपॉटच काय म्हणतात तो लागला होता. प्रकाशन, ट्रेलर लॉन्च, गायन, वादन, नृत्य, अभिवाचन, गप्पा, किस्से, धमाल ऑल इन वन.
पुस्तक चाळताना बऱ्याच नवीन गोष्टी कळत गेल्या. सुबोधचे सुरुवातीचे दिवस, पंडितजी आणि खांसाहेबांच्या भूमिकेसाठी कुणाला घ्यायचे यासाठी सुबोधने निवडलेले पर्याय, त्यासाठी घेतलेल्या भेटीगाठी वाचून तर चकित व्हायला होतं. 'कट्यार नाटक तू दिग्दर्शित करशील का' हे राहुलनी सुबोधला अमेरिकेत त्याचा मैतर हा शो पाहून विचारले तो क्षण, लोकमान्य साकारताना मेकअपमन विक्रम गायकवाड यांनी केलेली जादू, या आणि अशा बऱ्याच गोष्टी पुस्तकात आहेत. मुबलक रंगीत चित्रेही आहेत. छपाई, बांधणी, ग्लॉसी पेपर यामुळे पुस्तक नक्कीच आकर्षक झाले आहे आणि त्यातला कन्टेन्ट तर आणखीनच दर्जेदार आहे. मुखपृष्ठ अगदीच सूचक आणि बोलके.
थँक यू सुबोध आणि संपूर्ण घेई छंद टीम.. जादू करत आला आहात तुम्ही.. यापुढेही करत राहा..
आता जाता जाता एक महत्त्वाची गोष्ट - हे सगळं वाचत असताना माझ्यावर जळत असलेल्यांसाठी - मित्र हो, पर्वा करू नका, झाडून सगळे चॅनेलवाले आले होते म्हटल्यावर मीडिया कव्हरेज होतंच, टीव्हीवर दाखवतीलच.. यू ट्यूबचे नशीब जोरावर असेल तर संपूर्ण कार्यक्रम काही दिवसांनी यू ट्यूबवरही अपलोड होईल कदाचित. अवश्य लाभ घ्यावा.
पुस्तक नक्की वाचा.. आनंद लुटा लेको
